A obra ‘Made in Galiza’ sube ao escenario do Teatro Principal cunha reivindicación a prol da lingua galega, os días 16 e 17 de maio, polo Día das Letras Galegas. A montaxe de Sarabela Teatro adapta a obra homónima de Séchu Sende , gañadora do Premio Ánxel Casal ao Libro do Ano da Asociación Galega de Editores (AEG).

Esta representación teatral, cuxo texto asinan Fina Calleja e Fernando Dacosta , aborda temas vinculados á sociolingüística desde un enfoque cómico e crítico que utiliza o humor para convidar á reflexión. Calleja tamén dirixe a obra, protagonizada por Dacosta, Sabela Gago, Elena Seijo e Josito Porto.

‘Made in Galiza’ chega a Compostela con dúas actuacións. A primeira será o xoves 16 de maio ás 20:30 horas e seguirá un coloquio co equipo. A segunda oportunidade coincidirá co Día das Letras Galegas, o venres 17 de maio ás 20:30 h.

As entradas pódense mercar na web de Compostela Cultura, no despacho de billetes da Zona C e no Teatro Principal.