O festival Feito a Man volve á cidade coa súa 21 edición para converter as rúas e prazas de Compostela nun vibrante panorama musical. Terá lugar do 5 ao 24 de agosto e a asistencia ás actuacións será totalmente gratuíta.

O acto está organizado pola Asociación Cultural Cidade Vella en colaboración co Concello de Santiago e a Deputación da Coruña. Un dos seus obxectivos é dar a coñecer o talento dos artistas da cidade e o potencial da zona monumental como contorno para a súa visibilidade.

Esta edición contará con 36 propostas artísticas de diferentes estilos musicais, dende o jazz ata o groove, pasando polo folk, o blues e a música tradicional galega. Entre os artistas que actuarán destacan Ruxe-Ruxe, Ailá e Biribirlocke, así como novos grupos como Pablo Leira e o dúo composto por Gloria Pavía e Rafa Morales. Ademais, o festival acollerá a nomes internacionais como os arxentinos Claudio H. Mestís Trío e Lacandona, e os cubanos LAYUCA, David Álvarez e o trío Café Son e Alejandro Varga, entre outros.

Mira esta publicación en Instagram

Unha publicación compartida por Feito á Man (@amanfeito)

O escenario NARF, o corazón do festival

O escenario central do festival, coñecido como NARF en homenaxe ao falecido cantautor galego Fran Pérez Narf, estará situado na praza da Quintana e Praterías. Este espazo acollerá a programación conxunta dos establecementos organizadores. Feito a Man comezará o 5 de agosto na Praza dos Gatos cun concerto de Verónica Codesal e pecharase o 24 de agosto no Escenario NARF co grupo Chekan.

Vive a música en Compostela con este festival, que reafirma o casco histórico como epicentro cultural e musical de referencia. Podes consultar o programa completo nesta ligazón.