Máis de cincuenta marcas galegas de moda, xoiería, cestaría, decoración, cerámica e mesmo alimentación participarán este domingo en ‘Sabor a novo’, un evento que pretende poñer en valor a artesanía e o comercio local. Terá lugar no Pazo de San Lourenzo e contará con música, obradoiros e unha gran oferta gastronómica para todos os gustos.

Sabor a novo, organizado pola directora de Correveydile, Mónica Mejías, comezará ás 12 horas e porá o broche de ouro a unha fin de semana de protagonismo do comercio local grazas a Prima 24, que se celebrará o venres e o sábado.

No evento participarán máis de cincuenta marcas galegas que mostrarán e venderán as súas coleccións de moda, xoiería, bixutería, cerámica, cestaría, decoración e produtos alimenticios. Os visitantes poderán descubrir novas coleccións de obradoiros co selo de Artesanía de Galicia, así como novos produtores, creadores e artistas galegos.

Ademais, nos xardíns do Pazo de San Lourenzo haberá moitas actividades complementarias, como concertos, sesións de DJ, obradoiros de creación artesanal e unha grande oferta gastronómica. A entrada será gratuíta e haberá servizo de gardería para os máis pequenos.

Sabor a novo tamén será unha oportunidade única para coñecer o Pazo de San Lourenzo, un espazo privado incluído no Patrimonio Artístico Nacional. As actividades da feira desenvolveranse tanto nos xardíns como no claustro e nas distintas salas do edificio.