A parroquia de San Xoán de Fecha, en Santiago de Compostela, prepárase para acoller o vindeiro sábado 13 de xullo a terceira edición do Festival Rupestre e de Proximidade O Fechiño. Este evento, organizado por aCentral Folque, promete ser unha xornada chea de actividades culturais e sostibles que permitan gozar en familia mentres conectan coa comunidade local e co patrimonio rupestre da zona.

O festival comezará ás 10:30 horas cun roteiro rupestre sonoro guiado polo Clube Espeleolóxico Maúxo, que levará aos participantes a percorrer varias estacións líticas da comarca. Ao mediodía, ás 14:30 horas, celebrarase unha comida popular en Lamascal, onde se instalará unha carpa para que os asistentes poidan gozar da súa comida en paz. Durante a comida posterior farase entrega do ‘Fechiño de honra’ a Francisco Miramontes Sánchez en recoñecemento á súa traxectoria e implicación na parroquia.

Pola tarde, ás 17 horas, o dúo Aldaolado presentará o seu espectáculo ‘O Benquerer(se)‘, seguido ás 18:30 horas de Carme Campo, que ofrecerá o seu ‘Baile Assalto‘ para animar aos presentes a bailar muiñeiras e iotas.

Ademais, organizaranse dous roteiros adicionais para os que será necesario inscribirse previamente enviando un correo electrónico a ofechinho@folque.com. O primeiro, ‘Paisaxes que falan‘, terá lugar ás 17 horas e estará guiado por David Fontán e Lucía Santiago. O Colectivo A Rula encargarase do segundo, ‘Roteiro Rupestre‘, ás 18:30 horas.

O peche desta xornada estará marcado polos concertos de Caamaño & Ameixeiras, que subirán ao escenario ás 21 horas, e Os d’Abaixo, ás 22:30 horas.

 

Mira esta publicación en Instagram

 

Unha publicación compartida por aCentral Folque (@acentral_folque)