A música de vangarda dos séculos XX e XXI leva Santiago de Compostela cunha nova edición das Xornadas de Música Contemporánea, do 5 ao 20 de xuño. Baixo o lema de ‘Caleidoscopio’, ofrecerán unha proposta artística moderna e variada con sete concertos e un espectáculo de danza en directo.

O Auditorio de Galicia, o Centro Galego de Arte Contemporánea (CGAC) e o Teatro Principal serán as sedes do evento, no que participarán a Joven Orquesta Nacional de España (JONDE), o Ensemble Liberdade, a Banda Municipal de Música de Santiago de Compostela e a compañía de danza Lookatthingsdifferent.

Santiago, punto de encontro da JONDE

A Joven Orquesta Nacional de España elixiu un ano máis á capital galega para acoller o seu encontro anual, do 31 de maio ao 4 de xuño. Así, a JONDE converterá o Auditorio de Galicia no centro da súa actividade artística e educativa, enfocada no estudo e preparación do repertorio sinfónico e de cámara. Durante este tempo, prepararán dous recitais, dirixidos polo conxunto alemán Ensemble Modern e baixo a dirección de Pablo Rus, que se presentarán en concerto os días 5 e 9 de xuño ás 20:30 h.

Tamén traballarán en tres proxectos de cámara baixo a tutela do Trío Arbós e o clarinetista Joan Enric Lluna, que se ofrecerán os días 6, 7 e 8 de xuño ás 20:30 horas.

Esta programación incluirá unha importante mostra da creación musical contemporánea dos últimos anos do século XX e dos primeiros do XXI. Nestes cinco concertos representaranse un total de 22 obras, entre elas 6 estreas.

Todas estas actuacións serán gratuítas ata completar aforo.

Un caleidoscopio de son vangardista

Así mesmo, o Ensemble Liberdade participará nas Xornadas de Música Contemporánea. A formación guerrilleira da Orquestra Galega de Liberdade ofrecerá un concerto o mércores 12 de xuño ás 20:30 horas no CGAC.

O martes 18 de xuño, tamén ás 20:30 horas, pero no Teatro Principal, a compañía de danza Lookatthingsdifferent presenta SOMOS, unha obra á vez delicada e moi esixente fisicamente que busca esvaer roles e estereotipos de xénero ao son da música orixinal de Nico Casal.

A Banda Municipal de Música de Santiago porá o broche de ouro a estas xornadas. O último concerto da edición terá lugar o xoves 20 de xuño ás 20 horas no Teatro Principal e a entrada será gratuíta.

Podes consultar o programa completo na seguinte ligazón.