O Bosque de Galicia sitúase nas ladeiras do Monte Gaiás e forma parte das actuacións que se realizan nas inmediacións do complexo da Cidade da Cultura para potenciar a súa conexión e integración co medio urbano de Santiago de Compostela.
Esta nova zona da capital galega, promovida pola Xunta de Galicia , pretende consolidarse como un novo pulmón verde que se estende por 24 hectáreas e preto de 3.000 metros cadrados.
Este entorno natural, acondicionado entre 2015 e 2016, presenta preto de doce mil árbores de especies autóctonas, como carballos, castiñeiros, salgueiros, bidueiros, ameneiros, espinheiros, serbales e loureiros. Nos traballos de plantación participaron decenas de cidadáns e escolares.
O obxectivo do Goberno galego é aumentar o atractivo do complexo do Gaiás, potenciar a biodiversidade da zona e favorecer as visitas a pé de veciños da cidade e turistas. De feito, o percorrido está composto por unha rede de 5 quilómetros de sendas peonís, que favorece tanto o paseo a pé como as actividades deportivas ao aire libre.
A estrutura desta ramificación de sendeiros permite ascender ao Gaiás mediante itinerarios suaves e con diversas alternativas para todos os visitantes. Ademais, conta con numerosas zonas de descanso e un miradoiro na parte superior onde se contempla unha completa panorámica da capital galega.
Todo o recinto no que se instala esta zona verde conta cun sistema led de baixo consumo, que facilita o desfrute destes camiños en horas de pouca luz natural e, ao mesmo tempo, ofrece unha iluminación suave e funcional que evita a contaminación lumínica.
De feito, a Cidade da Cultura organiza, nos meses de verán, unha serie de actividades dirixidas á observación do ceo nocturno de Compostela a través do programa ‘Visitas Astronómicas’.
Por outra banda, a integración do Bosque de Galicia co complexo do Gaiás permite aos seus visitantes gozar da proximidade de destacados espazos museísticos e da obra arquitectónica deseñada por Peter Eisenman .
