As rúas de Compostela encheranse de música, pasacalles, animación infantil e moitos agasallos no marco de ‘Prima 24’, a festa do comercio local que terá lugar os días 14 e 15 de xuño.

O evento volve cunha cuarta edición coa que quere poñer en valor os establecementos da cidade e convidar aos seus asistentes a consumir alí. Conta cunha ampla programación que abarcará distintos espazos de Santiago.

A festa do comercio local arrancará o venres 14 con varios desfiles. O da zona vella correrá a cargo da banda Tanto nos ten, mentres que Pulpiño Viascón dinamizará Conxo e Pontepedriña co seu espectáculo. Na zona de Concheiros e San Pedro estará Troula Animación co seu espectáculo O’ estraño caso do dentista na rúa Blasov’. Por outra banda, na Praza Roxa celebrarase ‘Prima pequena‘, unha festa infantil con maxia e música que contará coas actuacións de Mamá Cabra, Joshua Kenneth e Pakolas.

O sábado día 15 chega ‘Prima 24’ cunha chea de opcións para todos os gustos. Na praza de Cervantes haberá unha exposición dos mestres artesáns de Ourives de Compostela, de 10 a 14 e de 16 a 20 horas. O Trío Detrés amenizará a Praza Roxa co seu espectáculo ‘+Ritmo’ a partir das 12 horas.

A axenda desta xornada tamén incluirá senllos desfiles pola zona vella e a ampliación da cidade. A primeira será pola mañá, coas acrobacias e malabares da compañía Tótem; e a segunda, pola tarde, co repertorio de jazz dos Dixie Kings.

Por último, a praza de Feixóo será escenario de dous concertos: a partir das 13 horas a cargo de Ukestra do Medio e ás 20 horas de Anxo Araújo. En caso de choiva, estes concertos trasladaranse á praza de Mazarelos.

Cristina, propietaria de ‘La Tienda de María’ no Ensanche de Compostela.

Agasallos e premios por apoiar o local

Como edicións anteriores,Prima 24 chega coa súa tradicional ruleta de premios ‘Eu mercohere’, que se instalará o venres pola tarde na Praza Roxa e o sábado na Praza do Toural. Nela poderán facerse con diferentes premios todos aqueles que presenten un ticket de compra superior a 5€, realizado nunha tenda de Santiago entre o 10 e o 15 de xuño. Cada participación dá dereito a unha rolda.

Podes consultar o programa completo premendo aquí.