A 38 edición do festival de cine Cineuropa volve a Santiago cunha programación que inclúe máis de 130 películas de todo o mundo. Terá lugar do 7 ao 29 de novembro e acollerá diferentes actividades paralelas dirixidas á mocidade.

O acto comezará no Teatro Principal coa proxección de ‘Por todo lo alto’, dirixida por Emmanuel Courcol, tras conseguir o premio do público no Festival de San Sebastián. Este ano, Cineuropa chega baixo o lema de ‘O corazón do cinema é a liberdade’ e explorará esta temática ao longo das súas proxeccións.

A sección oficial do ciclo está formada por destacados filmes nacionais e internacionais, que veñen da man de figuras consolidadas como François Ozon (‘Cando cae o outono’), Bruno Dumont (‘O imperio’), Quentin Dupieux (‘O segundo acto’), Andrea Arnold (‘Bird’), Mike Leigh (‘My Only Family’) ou Paul Schrader (‘Oh Canada’). A estas voces súmanse producións de novos cineastas que reflicten a diversidade cultural e creativa do panorama global.

Cineuropa repite, por cuarto ano consecutivo, como festival competitivo coa súa sección New Filmmakers, onde doce filmes competirán polo premio principal. Farano baixo a mirada dun xurado formado pola cineasta brasileira Flávia Castro, a directora, guionista e intérprete Sonia Méndez e a programadora e xornalista cultural uruguaia María José Santacreu. Entre os candidatos destacan filmes de países como Colombia, Iraq ou a India, seleccionados tras pasar por recoñecidos festivais europeos como Locarno ou Cannes.

Un programa con proxeccións exclusivas

Esta edición chega con varias estreas, como o documental ‘7291‘ de Juanjo Castro, que trata en profundidade o acontecido nas residencias de maiores dependentes da Comunidade de Madrid durante a pandemia.

Outra exclusiva de Cineuropa é ‘ From Darkness to Light ‘, un documental de Eric Friedler e Michael Lurie no que se afondan na película perdida de Jerry Lewis, un proxecto dos anos 70 que nunca viu a luz.

Elías Siminiani, vello coñecido do festival, volverá ao escenario de Cineuropa para estrear ‘O circo dos rapaces‘, unha serie que narra, a través de material de arquivo, o ascenso e caída de Benposta.

Henry Fonda para o presidente, ideal de sociedade

Unha das temáticas especiais desta edición xira arredor da figura do actor e mito estadounidense Henry Fonda, nunha sección paralela titulada ‘Henry Fonda for President. O corazón do cine é a liberdade. A retrospectiva explora como Fonda representou os valores democráticos e humanistas nunha serie de películas que describen a historia estadounidense. No marco desta sección, presentarase a película ‘Henry Fonda for President‘, de Alexander Horwarth, que dá nome a este bloque da programación. O filme analiza a conexión entre os personaxes interpretados polo actor e os ideais da sociedade estadounidense.

Así mesmo, Cineuropa contará con outras variadas seccións paralelas, como ‘Latidoamericano’, ‘Fantastique Compostela’ ou aquela que celebra o centenario de Marlon Brando e o método Actor’s Studio.

Os gañadores do festival

Na súa 38 edición, o festival homenaxeará ao director ferrolán Alberto Gracia, á actriz hispano-sueca Ingrid García-Jonsson e á directora brasileira Flávia Castro. Cada un deles recibirá o premio Cineuropa como recoñecemento á súa traxectoria en galas especiais ao longo de todo o evento, acompañadas das proxeccións dos seus traballos máis recentes.

Alberto Gracia recollerá o seu galardón o martes día 12 no Teatro Principal, onde se emitirá a súa película ‘La Parra’. Ingrid García-Jonsson recibirá o seu premio o xoves 14 tamén no Teatro Principal acompañada da proxección de ‘La Ballena’.

Finalmente, Flávia Castro obterá a máxima distinción de Cineuropa o mércores 20 no Salón Teatro, onde presentará ‘Diário de umaBusca’, que explora a súa propia infancia como refuxiada brasileira tras o golpe de Pinochet.

Actividades paralelas

Na súa aposta por achegar o cinema a todos os públicos, o festival organizou numerosas actividades paralelas, que incluíron proxeccións para nenos e mozos, unha selección de curtametraxes creadas no programa educativo ‘Cinema en Curso’, e unha xornada de formación sobre financiamento audiovisual en colaboración con AGAPI, EGEDA e Segoventure.

Ademais, homenaxearase ao cineasta español José Val del Omar e celebraranse concertos da Real Filharmonía de Galicia e da Banda Municipal de Santiago.

As sedes do festival serán o Teatro Principal, a Sala Teatro, o Auditorio de Galicia, NUMAX e a Zona C. As entradas xa están á venda na Zona C e nesta web. Podes consultar o programa completo do festival premendo aquí.