O Festival de Cine Euroárabe Amal regresa a Santiago de Compostela coa súa vixésimo primeira edición do 23 ao 28 de outubro no Teatro Principal . Este ano chega co lema de “Ninguén está a salvo” e cinco filmes cos que reflectir a diversidade e a situación do mundo árabe actual con películas que representan unha viaxe cultural por Exipto, Siria, Palestina, Tunisia e Marrocos.

O cartel deste ano inclúe unha sombría imaxe negra, que rende homenaxe ás vítimas do terremoto marroquí e das inundacións en Libia. Ademais, durante a presentación do evento, o director do festival, Ghaleb Jaber Martínez , mostrou a súa solidariedade co pobo de seu pai, Palestina , e condenou os asasinatos a ambos lados do conflito .

E, precisamente, a inauguración do luns día 23 xirará arredor deste tema cunha charla coloquio sobre Palestina , na que participará Jesús Núñez , patrón da Fundación Araguaney e codirector do Instituto de Estudos de Conflitos e Acción Humanitaria . Nela, recontextualizarán o que está a suceder e haberá entrada libre.

O martes 24 proxectarase ‘Conspiración no Cairo’, dirixida por Tarik Saleh . O mércores , será a quenda de ‘Entre as figueiras’ , de Eirge Sehiri, premiada en Cannes. O xoves presentarase a película siria ‘The Sake’ , dirixida por Basil Alkahbit, e o venres chegará o documental ‘Little Palestine , diary of a siege’ , dirixido por Abadallah Al-Khatib. A clausura terá lugar o sábado 28 coa película ‘The Blue Caftan’ , dirixida por Maryam Touzani.

O Festival Amal non é só un evento cinematográfico, é un encontro de culturas que abre a fiestra ao intercambio de ideas, a empatía e a comprensión. Ghaleb Jaber Martínez sinalou que é fundamental recoñecer e comprender a dor dos demais para evitar que se converta en rabia destrutiva. Por iso, esta semana do cine é unha oportunidade perfecta para que a xente vexa proxeccións difíciles de atopar no circuíto comercial.

Este evento está organizado pola Fundación Araguaney-Puente de Culturas e conta co apoio da Xunta de Galicia e do Concello de Santiago . Algo que agradeceu Ghaleb Jaber Martínez, destacando a importancia dun festival que considera “tan necesario” no panorama actual.

O Festival Amal preséntase como unha oportunidade ideal para coñecer a riqueza cultural e cinematográfica do mundo árabe, ao tempo que se promove a solidariedade e o entendemento no contexto actual marcado polas guerras e as catástrofes naturais. Por iso, se che interesa coñecer as historias que ofrece, non dubides en acudir ao Teatro Principal.