O Museo Centro Gaiás forma parte do gran conxunto de edificios da Cidade da Cultura de Galicia, situado no monte Gaiás e proxectado polo arquitecto estadounidense Peter Eisenman.
Esta institución busca consolidarse como un referente expositivo e arquitectónico do século XXI e é un dos edificios máis importantes do conxunto do Gaiás.
De feito, unha das súas liñas de actuación pasa pola colaboración coa rede museística galega e a busca de sinerxías con institucións internacionais, tanto a través de proxectos de coprodución como de intercambios que permitan contribuír á visibilización do patrimonio artístico galego máis aló do noso fronteiras.
O inmoble destaca pola súa enorme fachada, de case 43 metros de altura, e os seus máis de 16.000 metros cadrados de superficie.
Estas características permiten impulsar unha importante oferta de actividades divulgativas, formativas e expositivas, con máis de 6.600 metros cadrados dedicados a esta función e divididos en tres plantas.
O centro expón permanentemente na súa planta 0 un mural de Luís Seoane, realizado na Arxentina nos anos 70 por encargo de Isaac Díaz Pardo.
Esta obra foi deseñada para separar o taller das oficinas administrativas da Fábrica de Porcelana Magdalena –Celtia SA–, fundada polo propio Díaz Pardo na beira do Río da Prata.
No vestíbulo, atópase o mural ‘Traducción do corpo do Apóstolo a Santiago’, obra de temática xacobea de Urbano Lugrís.
O edificio alberga, nas súas tres plantas, exposicións temporais de alto nivel, con grandes mostras dedicadas a recoller o mellor do talento galego e dos autores internacionais. A filosofía da súa programación baséase en promover un diálogo entre as distintas tendencias artísticas, dende o local ata o global.
A cultura, na súa concepción máis ampla e inclusiva, é a gran protagonista deste espazo, que acolle e integra todo tipo de manifestacións artísticas, humanísticas, de creatividade e de coñecemento.
O acceso ás instalacións do Museo do Gaiás é gratuíto, de luns a domingo, de 10:00 a 20:00 horas.
O edificio tamén conta cun servizo de cafetería-restaurante situado na planta 0, xunto ao denominado Salón de Tirantes.
