A Igrexa de Santa Susana está situada nun dos lugares máis emblemáticos da cidade: a Alameda Compostelana, unha zona de gran afluencia turística e un dos espazos verdes con máis vida e presenza dos veciños de Santiago.
Este edificio relixioso, moi ligado á historia da capital galega e á tradición compostelá, está situado no corazón da carballeira, do mesmo nome, na culminación do Paseo da Ferradura.
A edificación do templo dedicado a Santa Susana, copatroa de Santiago xunto co Apóstolo, desenvolveuse ao longo do século XII e destaca polos seus diferentes elementos románicos e góticos.
Por outra banda, os xardíns que rodean o edificio foron doados á cidade polos condes de Altamira en 1546.
Orixinalmente, este lugar albergaba unha pequena igrexa dedicada a Todos os Santos, que pasou a titularidade de Santa Susana no ano 1102.
É un dos templos consagrados polo arcebispo Xelmírez para, segundo a tradición, albergar as reliquias de Santa Susana traídas da cidade portuguesa de Braga.
Pouco despois, a igrexa sufriu unha ambiciosa reforma que seguiu os canons da arquitectura románica.
Porén, o edificio actual é unha reconstrución que data dos séculos XVII e XVIII. Da igrexa primitiva, que aparece citada no Códice Calixtino, quedan algúns elementos.
Entre eles está o pórtico, parte dos arcos, columnas e ménsulas. Ademais, o templo alberga outras pezas de gran interese patrimonial, como unha cruz gótica que se sitúa no vértice da nave.
O campanario da Igrexa de Santa Susana foi produto dunha ampliación que se levou a cabo posteriormente e data do século XIX.
Dentro das anécdotas relacionadas coa vida social da cidade, o templo foi a sede da tradicional feira dos xoves de Santiago de Compostela ata os anos 70, cando se trasladou aos arredores, ao Mercado Nacional de Salgueiriños.
A pesar do seu marcado interese turístico e histórico, o edificio só está aberto ao público en celebracións concretas.
